Претседателот на Европскиот совет Доналд Туск не може во ниту еден момент да смета на поддршката од Полска за втор мандат на таа функција, изјави денеска лидерот на владејачката Партија на правото и правдата Јарослав Качински.
– Доналд Туск е политичар кој ги крши основните правила на Европската унија, истакна Качински за својот долгогодишен ривал и поранешен премиер на Полска.
– Некој кој крши толку правила едноставно не може да биде претседател на Европскиот совет и во никој случај не може да смета на тоа дека ќе го поддржиме или дека ќе немаме приговор, нагласи Качински.
Доналд Туск неодамна најави дека планира да се кандидира за втор мандат за претседател на Европскиот совет, наведувајќи дека за тоа има поддршка од сите членки на ЕУ, освен од родната Полска.