Американскиот претседател Доналд Трамп и јапонскиот премиер Санае Такаичи потпишаа рамковен договор за обезбедување резерви на ретки земни минерали, соопшти Белата куќа.
Договорот беше потпишан за време на посетата на Трамп на Јапонија, дел од патувањето во Азија насочено кон зајакнување на синџирите на снабдување со материјали критични за обновливата енергија, електрониката и автомобилската индустрија, објави Ројтерс.
Според соопштението на Белата куќа, САД и Јапонија планираат заеднички да инвестираат и да користат економски инструменти за развој на диверзифициран и фер пазар за ретки земни минерали. Трамп ќе се сретне и со кинескиот претседател Си Џинпинг за време на неговата посета на Азија.
Портпаролката на Белата куќа, Каролин Левит, изјави дека јапонскиот премиер Такаичи ќе го номинира Трамп за Нобелова награда за мир по нивниот состанок во Токио.
„За толку кратко време, светот почна да ужива во повеќе мир“, изјави Такаичи за новинарите, објави Танјуг.
За време на состанокот, Трамп му рече на Такаичи дека САД и Јапонија ќе имаат „фантастичен однос“.
„Отсекогаш сум имал големо почитување кон Јапонија и ова ќе биде однос посилен од кога било“, рече американскиот претседател.
На средбата во палатата Акасака, на Трамп му беше подарена палка за голф што му припаѓаше на покојниот премиер Шинзо Абе, симболичен потсетник на личното пријателство меѓу двајцата лидери, објавија медиумите.
Аналитичарите велат дека Такаичи, која беше близок соработник на Абе, се стреми да ги обнови односите со Вашингтон и да ја зајакне сопствената политичка позиција.
За време на работниот ручек, на Трамп и неговата делегација им беа послужени американски ориз и говедско месо подготвени со јапонски состојки, додека Такаичи презентираше мапа на јапонските инвестиции во Соединетите Држави.
Двајцата лидери разговараа за завршување на војната во Украина и заедничките напори за обезбедување ретки минерали.