Кризата на Блискиот Исток има потреба од Европа за да биде решена, изјави европратеничката Мариета Јанаку, која го подготви извештајот по прашањата за одбрана и заедничка безбедност во ЕУ.
Документот, во кој се препорачува потесна соработка, ќе биде разгледан денеска на пленарна седница на Европскиот парламент, а за утре е планирано усвојување на резолуција.
Во врска со наводниот напад врз Сирија по употребата на хемиско оружје во оваа земја, Јанаку коментира дека „едно е да се има реакција на цела ЕУ, а друго, ако на пример Франција соопшти дека ќе учествува веднаш“.
– Во првиот случај ќе бевме поорганизирани и попочитувани од Американците, додаде грчката европартеничка.
Според неа, не е можно да се изврши интервенција врз Сирија без копнена операција.
– Тоа не е Косово. За ваков напад треба да се размисли двапати пред да се спроведе, нагласи Јанаку.
Запрашана зошто земјите од ЕУ се двоумат заедно да работат во областа на безбедноста и одбраната, таа истакна дека некои влади се плашат дека таква соработка би била против НАТО.