Израелското Воено воздухопловство го бомбардираше домот на лидерот на Хамас во Појасот Газа, Исмаил Ханија, кој се наоѓа во бегалскиот камп „Шати“ во источниот дел на оваа палестинска енклава.
– Израелскиот непријател двапати ни го бомбардира домот, изјави Абед Салам Ханија, син на лидерот на Хамас.
Израел продолжува со бомбардирањата и артилерискиот оган врз целиот Појас Газа, при што само во текот на измината ноќ загинаа 17 лица, меѓу кои четири деца.
Осум деца и две возрасни лица вчера се убиени во бегалскиот камп „Шати“.
Двете страни се обвинуваат меѓусебно за одговорноста на оваа крвава драма.
Според палестински сведоци, израелски авиони-ловци Ф-16 истрелале ракети врз групата деца. Израелската војска, пак, тврди дека тие по грешка биле погодени од заскитани ракети истрелани од Газа.