Израел „рече да“ на најновиот предлог на американскиот претседател Доналд Трамп за ослободување на заложниците и договор за прекин на огнот во Газа, изјави израелскиот министер за надворешни работи, Гидеон Сар, за време на прес-конференцијата во Хрватска.
„Војната во Газа би можела да заврши утре“, рече Сар.
„Подготвени сме да прифатиме договор што би ја завршил оваа војна, врз основа на одлука на кабинетот“, им рече тој на новинарите на прес-конференцијата.
Тој, исто така, додаде дека израелската влада има две барања за крај на војната – ослободување на сите израелски заложници и положување на оружјето од страна на Хамас.
Разоружувањето на Хамас „обезбедува подобра иднина за народот на Газа, за Палестинците“, додаде Сар, нарекувајќи го Хамас „проблем за Палестинците и за регионот“.
САД и Израел сè уште не објасниле детално што опфаќа предлогот, иако некои наводни детали протекоа во печатот, вклучувајќи го и итно ослободување на сите заложници што се држат во Газа во замена за палестински затвореници и согласноста на Израел да не продолжува со борбите.
Вестите на Канал 12 во неделата објавија дека според новиот предлог, повлекувањето на Израел од Газа ќе биде постепено, но ќе се случи главно на почетокот на прекинот на огнот.
Преговарачите потоа ќе имаат 60 дена – или колку што е потребно – да постигнат договор за разоружување на Хамас, спецификите на израелското повлекување и алтернативна влада за Газа, дознава израелскиот телевизиски канал.