Израел се подготвува за брз напад врз иранските нуклеарни постројки доколку преговорите меѓу САД и Иран не успеат, објави американскиот портал „Аксиос“, повикувајќи се на два израелски извори запознаени со разговорите.
Израелската разузнавачка заедница го промени својот став само во последните неколку дена – од верување дека нуклеарниот договор е близу до постигнување, до мислење дека преговорите наскоро би можеле да пропаднат, тврдат извори.
Еден извор изјави дека израелската војска верува дека нејзиниот оперативен прозорец за успешен напад наскоро може да се затвори, па затоа Израел ќе мора брзо да дејствува ако разговорите не успеат. Изворот не сакаше да открие зошто војската верува дека нападот подоцна ќе биде помалку ефикасен.
„Имаше многу обуки и американската војска гледа сè и разбира дека Израел се подготвува“, изјави еден извор за „Аксиос“.
И двата извори потврдија извештај на Си-Ен-Ен дека Израелските одбранбени сили (ИДФ) спроведуваат вежби и други подготовки за можен напад врз Иран.