Израелската армија уби најмалку 28 лица во Газа и рани десетици во последните напади во текот на ноќта, објави денес палестинската новинска агенција WAFA, повикувајќи се на медицински извори.
Армијата на својот Телеграм канал напиша дека продолжува со операциите против „терористичките организации низ Појасот Газа“ и дека вчера „елиминирале неколку терористи низ Појасот Газа и нападнале воени комплекси, оружје, магацини и снајперски позиции“.
Израелската војска тврди дека воздухопловните сили погодиле повеќе од 75 цели, вклучувајќи „терористи, лансери, воени комплекси, складишта со оружје и дополнителна терористичка инфраструктура“. Тврдењата на двете страни засега не можат независно да се потврдат.
Војната во Газа беше предизвикана од терористички напад на Хамас и други милиции во Израел на 7 октомври 2023 година. Израел одговори со масовна воена операција во Газа. Според палестинските здравствени власти, израелската армија убила повеќе од 53.000 Палестинци во напади.
Од почетокот на нападот врз Газа, израелската армија убила речиси 18.000 деца. Според Обединетите нации, 14.000 бебиња се на работ на глад поради израелската блокада на хуманитарната помош.