Израелски специјални единици во текот на ноќта започнаа копнена операција во северниот дел на Појасот Газа, која е прва откако во вторникот е започната офанзива против палестинското движење Хамас, јави израелското радио.
Мета на краткиот упад на палестинска територија било место за лансирање ракети. Военото крило на Хамас, Бригадите Изадин ал Касам, потврди дека израелски командоси започнале престрелка со палестинските борци.
Израелски воен портпарол истакна дека четворица израелски војници биле полесно повредени за време на оваа операција.
Претходно, израелската војска им нареди на Палестинците, кои живеат во северниот дел на Појасот Газа да се евакуираат поради сопствена безбедност.
Бригадниот генерал Моти Алмоз, кој е главен воен портпарол, изјави дека Израел планира да го нападне тоа подрачје во следните 24 часа, со цел да ја зајакне офазивата против екстремистите во Појасот Газа, од каде се истрелуваат ракети кон Тел Авив.