Италија одби да им дозволи на американските воени авиони да слетаат во воздухопловната база Сигонела на Сицилија на пат кон Блискиот Исток, потврди извор запознаен со ситуацијата. Ова ги потврдува претходните медиумски извештаи, пренесува Ројтерс.
Дневниот весник „Кориере дела Сера“ објави дека американските бомбардери требало да слетаат во база во источна Сицилија пред да го продолжат летот кон Блискиот Исток.
Според весникот, дозволата била одбиена бидејќи САД не побарале официјално одобрение ниту се консултирале со италијанската војска, што е потребно според договорите што го регулираат користењето на американските воени објекти во Италија.
Изворот, кој сакал да остане анонимен бидејќи не е овластен да зборува со медиумите, не го прецизирал бројот на вклучени авиони или кога точно Рим ја одбил дозволата. Досега нема коментар од италијанското Министерство за одбрана.
Опозиционите партии од левиот центар ја повикаа владата да го блокира користењето на американските бази во Италија за да се избегне вовлекување на земјата во конфликт. Централно-десничарската влада на премиерката Џорџија Мелони претходно објави дека ќе побара одобрение од парламентот доколку бидат поднесени такви барања. Шпанија вчера го затвори својот воздушен простор за американските авиони што учествуваат во нападите врз Иран.