Локален командант на иранските паравоени сили „Басиџ“ е убиен во терористички напад во југоисточниот дел на земјата во вторникот, објавија државните медиуми.
Абдолрауф Ешаги, командант во областа Паруд во провинцијата Систан-Балучистан, „загина како маченик“, објави новинската агенција „Тасним“, без да наведе дополнителни детали за нападот.
Засега не е познато кој стои зад нападот.
Иранските власти во понеделникот соопштија дека за време на операција против засолништата на милитантните групи што се противат на власта во оваа провинција, загинале три лица, а девет биле уапсени.
Систан-Балучистан, провинција што граничи со Пакистан и Авганистан, со децении е поприште на судири меѓу иранските безбедносни сили, бунтовниците и шверцерите на дрога.
Тоа е една од најсиромашните ирански провинции, каде што живее голема етничка заедница на Балучи.
Повеќето припадници на таа заедница се сунитски муслимани, додека мнозинството од населението во Иран го сочинуваат шиитски муслимани.