Напаѓачот кој уби најмалку 27 луѓе во црква во во Баптистичка црква во градот Садерленд Спрингс, Тексас, е белец на возраст од околу 20 години, јави телевизиската мрежа Еј-Би-Си.
Телевизијата повикувајќи се на полициски извори наведува дека е извршена прелиминарна идентификација на напаѓачот и е откриено дека тој неодамна се „пофалил“ на Фејсбук со пушка која наликува на АР-15.
Според очевидци на инцидентот, напаѓачот истрелал повеќе од 30 куршуми од полуавтоматско оружје.
Напаѓачот мирно влегол во црквата за време на неделната служба и почнал да пука, при што уби 27 лица, а десетина се повредени. Во инцидентот убиен е и напаѓачот.
Се уште не е познат мотивот за нападот.
Истрагата за нападот ја спроведува ФБИ. Тоа е најсмртоносно масовно убиство во историјата на Тексас и најсмртоносен напад во некој верски објект во историјата на САД.
Нападот во Тексас се случи само еден месец откако 64-годишниот Стивен Педолк во Лас Вегас уби 58 луѓе, а повреди над 500 лица. Нападот на Педок досега е најсмртоносен во историјата на САД.
Заедно со нападот во Тексас, во последните десет години во САД во пет слични злосторства убиени се речиси 200 луѓе.
Американскиот претседател Доналд Трамп, кој е на 12-дневна турнеја во Азија, изјави дека ја следи ситуацијата во Тексас.
– Бог нека биде со народот на Садарленд Спрингс. ФБИ и претставниците на законот се на лице место. Ја следам ситуацијата од Јапонија, напиша Трамп на Твитер.