Американската војска соопшти дека уште еден проектил истрелан од јеменските бунтовници Хути бил пресретнат во јужниот дел на Црвеното Море.
Бунтовниците истрелаа противбродска крстосувачка ракета врз разурнувач на американската морнарица во неделата околу 16:45 часот по локално време, соопшти регионалната команда на американската војска рано во понеделникот на социјалната мрежа X.
Ракетата беше пресретната од американските воздушни сили во близина на јеменскиот крајбрежен град Ал Худајда. Нема извештаи за жртви или материјална штета.
Од избувнувањето на војната во Газа меѓу Израел и исламистичката милитантна група Хамас, Хутите поддржани од Иран постојано напаѓаа бродови во Црвеното Море.
Големите бродски компании се повеќе ја избегнуваат оваа рута. САД и Обединетото Кралство неодамна ги нападнаа позициите на групата во Јемен, со поддршка од Холандија, Канада, Австралија и Бахреин.
Од избувнувањето на војната во Газа на 7 октомври, бунтовниците Хути, кои контролираат големи делови од Јемен, постојано го напаѓаа Израел со беспилотни летала и проектили.
Неодамна, тие често напаѓаа бродови во Црвеното Море – еден од најважните морски патишта за светската трговија што води до Суецкиот канал.