Два холандски борбени авиони „Ф-16“, кои како дел од НАТО патролираат на небото над балтичките држави, пресретнаа руски транспортен авион „Иљушин“, во воздушниот простор на Естонија и Литванија, соопшти владата на Холандија.
Како што стои во соопштението по пресретнувањето рускиот авион се упатил во правец на Калињинград.
НАТО во октомври соопшти дека оваа година имало повеќе од 100 случаи на пресретнување на руски авиони. Минатиот месец норвешки авиони „Ф-16“ полетаа поради четири руски бомбардери.
Министрите за одбрана на Велика Британија, трите балтички држави, како и на Норвешка, Данска, Финска и Шведска се договорија за соработка во поглед на разузнавање и воздушна обука, за да одговорат на зголемените активности на Москва на север на Европа.
Руското Министерство за одбрана негира дека нивен авион „Иљушин-76 “ го нарушил воздушниот простор на Естонија и Литванија.
-Рускиот воен транспортен авион „Иљушин -76“ беше на рутински лет од местото Псков кон регионот на Калињинград. Летот го продолжил долж трасата преку неутралното подрачје над Балтичкото море во рамки на меѓународните правила за користење на воздушниот простор, се наведува во соопштението на руското министерство.
Е. Г.