Украина треба да спроведе реформи во борбата против корупцијата и зајакнување на владеењето на правото, со цел да добие помош од Европската унија, изјави еврокомесарот за соседство и преговори за проширување Јоханес Хан, пренесува ТАСС.
Изјавата на Хан следи по првата седница на Советот за асоцијација ЕУ-Украина.
Според зборовите на Хан по извршените разговори во Киев нема сомнеж дека украинската влада располага со солидна програма за реформи, но потребни се конкретни резултати, а не само ветувања.
Премиерот на Украина Арсениј Јацењук по средбата изјави дека Киев има потреба од надворешна финансиска помош од ЕУ, Меѓународниот монетарен фонд, САД и државите од групата Г-7.
Високиот претставник на ЕУ за надворешна политика Федерика Могерини, по средбата на Советот за асоцијација изјави дека ЕУ нема да ја признае анексијата на Крим кон Русија. Могерини утре се очекува да пристигне во посета на Киев.