Амнести Интернешнл ги обвини Хамас и другите палестински вооружени групи во својот последен извештај за злосторства против човештвото за време и по нападот на 7 октомври 2023 година, што ги предизвика судирите во Газа.
Во извештајот од 173 страници се наведува дека „палестинските вооружени групи извршиле прекршувања на меѓународното хуманитарно право, воени злосторства и злосторства против човештвото за време на нивните напади врз јужен Израел што започнаа на 7 октомври 2023 година“, објави „Тајмс оф Израел“.
Амнести потсетува дека претходно го обвини Хамас за воени злосторства на 7 октомври, додавајќи дека терористичката група „продолжила да ги крши правилата и да извршува злосторства според меѓународното право со држење и злоупотреба на заложници и задржување на телата на киднапираните“.