Во израелските воздушни напади загинаа најмалку шест Палестинци кои чувале камиони што превезувале хуманитарна помош од ограбувачи, соопштија денес претставници на Хамас.
Хамас во соопштението наведува дека шест члена на безбедносниот тим задолжен за чување на хуманитарни пратки биле убиени и дека договорот на Израел да им дозволи на камионите што носат хуманитарна помош во воено разурнатата енклава бил „измамен маневар“ за да се избегне меѓународен притисок со кој се бара прекин на блокадата на Газа, објави Ројтерс.
Израелската војска претходно соопшти дека вчера 107 камиони што превезуваат брашно и други прехранбени производи, како и медицински материјали, влегле во Појасот Газа преку преминот Керем Шалом.