Се наоѓаме во момент од пресудно значење за правата на жените, а Обединети нации треба да бидат пример во целиот свет кога се работи за родова рамноправност, изјави денеска генералниот секретар на ОН, Антониот Гутереш по повод 8 март, Меѓународниот ден на жените.
Тој посочи дека историската и систематска нееднаковост овозможиле репресија и дискриминација во цел свет, на социјалните мрежи, на филмските сетови, во фабриките, како и на улиците. Остварувањето на родова рамноправност и зајакнувањето на жените и девојчињата е недовршена работа и претставува најголем предизвик на нашиот свет во областа на човековите права.
– Активизмот на жените даде резултати. Поголем број девојчиња посетуваат училиште; се поголем број жени имаат добро платена работа и заземаат високи позиции во приватниот сектор, академската сфера, политиката и меѓународните организации, вклучително и ОН. Родовата рамноправност е втемелена во безброј закони, а штетните пракси, како сакатењето на женските гениталии и детските бракови, во многу држави се забранети. Но, треба да ги отстраниме сериозните препреки ако сакаме да ја надминеме историската нерамнотежа на моќ, што е основа за дискриминација и експлоатација, посочи Гутереш.
Тој во својот говор се осврна и на сексуалното насилство во семејството, истакнувајќи дека над една милијарда жени во светот не се со закон заштитени од таквиот вид насилство.
– Дури и таму каде постојат закони, често не се почитуваат, а жените кои бараат правна заштита често наидуваат на сомнеж, осуда и омаловажување. Денес знаеме дека сексуалното вознемирување и злоставување се присутни на работното место, во јавниот простор и во домот, и тоа во држави кои се гордеат со своите резултати во областа на родовата рамноправност. ОН треба да бидат пример во целиот свет, наведе Гутереш.