Градскките власти на Одеса соопштија дека градот синоќа бил цел на ракетни напади. Информираат дека руските сили ја гранатирале Одеса од Црното Море.
„Како резултат на ракетен напад од морето, беа погодени инфраструктурни објекти во регионот на Одеса. Деталите се разјаснуваат“, напишаа градските власти на Телеграм.
Русија соопшти дека уништила центар за обука на странски платеници во Украина, северно од Одеса. Тврдењето го пренесе руската новинска агенција Тасс.
Одеса е стратешки клучен град. Нејзината окупација ќе им овозможи на Русите територијално да ги поврзат сепаратистичките региони и анектираниот Крим, а Украина ќе остане без пристап до Црното Море. Последиците би се почувствувале на глобално ниво, имајќи предвид дека Одеса е извозно пристаниште низ кое поминува значителен дел од украинскиот извоз на пченица.