Градоначалникот на Лондон, Садик Кан, го нарече претседателот на САД – Доналд Трамп, расист, сексист и исламофоб, објави денес британскиот Скај њуз.
Откако Трамп рече дека Лондон е управуван од ужасен градоначалник и дека Лондон сака да работи според шеријатскиот закон, Кан одговори дека има впечаток дека „живее во главата на Трамп и не плаќа кирија“.
„Мислам дека претседателот Трамп покажа дека е расист, сексист, мизогинист и исламофобичен. Лондон е најголемиот град во светот, побезбеден од големите градови во САД. Со задоволство го пречекуваме рекордниот број американски граѓани кои се преселуваат тука“, рече Кан.
Претседателот на САД, за време на неодамнешното враќање во Вашингтон од Велика Британија, го обвини Кан и за криминалот во Лондон, за кој рече дека е „на својот врв“, и додаде дека градоначалникот е „катастрофа“ за имиграцијата.
Лошиот однос меѓу двајцата, потсетува Скај њуз, датира од 2015 година, кога Трамп, за време на кампањата за претседателските избори во САД, повика на целосна забрана за влез на муслимани во САД.