Поранешниот советник на Кремљ, Сергеј Марков, изјави дека основачот на Вагнер, Евгениј Пригожин е потенцијално најголемата закана за Владимир Путин, опишувајќи го како „гласот на народот“ затоа што „ја зборува вистината“. Политичкиот притисок врз Путин се зголемува по успешната украинска контраофанзива и неуспесите на Русија на бојното поле, а неговите сојузници станаа погласни во критиките за начинот на кој се води војната.
Некои аналитичари во последните недели сугерираа дека Пригожин е тој што може да претставува закана за владеењето на Путин. Пригожин, познат како „готвач на Путин“, неодамна се најде на насловните страници поради неговите остри критики кон воените лидери и богатите руски олигарси, што поттикна шпекулации дека тој се обидува да го консолидира своето влијание во Русија.
Зголемената популарност на Пригожин неодамна беше забележана од воени експерти. Институтот за проучување на војната (ИСВ) на 24 октомври напиша дека Пригожин продолжува да се здобива со моќ во Русија и дека платеничката паравоена група Вагнер би можела „да претставува закана за владеењето на Путин“.
Иван Клишч, научен соработник во Меѓународниот центар за одбрана и безбедност, претходно изјави за „Њузвик“ дека е можно Пригожин да му се спротивстави на Путин. „Веројатно ќе се обиде да го прошири своето влијание во федералната политика. Во оваа смисла, Путин ќе мора да се сретне со него. Во спротивно, Путин ризикува да отуѓи моќен сојузник кој навистина може да се сврти против него или барем да престане да соработува“, рече Клишч.