Германскиот министер за надворешни работи Хајко Мас, предупреди денеска во Њујорк дека преголем притисок кон Иран може да го наведе Техеран да продолжи со воената нуклеарна програма и да го дестабилизира Блискиот исток.
Мас на маргините на заседанието на Генералното собрание на ОН изјави дека три земји членки на ЕУ, Русија и Кина минатата ноќ се договориле да се обидат да го одржат нуклеарниот договор со Иран од 2015 година, и покрај повлекувањето на САД од тој договор.
– Голема едногласност владее меѓу релевантни страни дека сакаме да го одржиме тој договор на сила и да ги ублажиме последиците од американските санкции, изјави германскиот министер, додавајќи дека тоа го опфаќа олеснувањето на плаќање на иранскиот извоз.
Мас истакна дека Германија е загрижена дека „под најголем можен притисок, Иран еден ден може повторно да продолжи со воената нуклеарна програма“.
-Ние тоа не сакаме, бидејќи тоа ќе го запали целиот регион, заклучи германскиот министер.