Германската влада ги повика своите граѓани што е можно поскоро да го напуштат Иран, предупредувајќи дека безбедносната ситуација во земјата останува многу сериозна и непредвидлива.
Според германското Министерство за надворешни работи, нивото на закана во Иран останува високо, а на германските граѓани им се советува да не патуваат во земјата поради можни безбедносни ризици, вклучително и произволни апсења и ограничена конзуларна помош.
Особено се предупредуваат лицата со двојно државјанство, за кои, според Берлин, постои зголемен ризик од притвор, додека пристапот до германските дипломатски служби во такви случаи е значително потежок.
„Безбедносната ситуација во Иран е нестабилна, а конзуларната помош може да биде многу ограничена“, се вели во соопштението на германското Министерство за надворешни работи.
Повикот од германските власти доаѓа во време на зголемени регионални тензии и влошување на односите меѓу Иран и Западот, поради што неколку европски земји ги разгледуваат препораките за нивните граѓани да патуваат и да престојуваат во земјата.