Постои можност руската вакцина „Спутник V“ да биде одобрена во ЕУ, изјави денеска шефот на германскиот комитет за вакцинација Томас Мертенс во интервју за „Рајниче пост“.
– Тоа е добра вакцина која веројатно, во одреден момент, ќе добие официјално одобрување од надлежните институции на ЕУ. Руските експерти имаат долгогодишно искуство со вакцините, рече Мертенс.
На почетокот на февруари, меѓународното медицинско списание „Ленсет“ објави преглед на резултатите од третата фаза на клинички испитувања на вакцината „Спутник V“, со што се потврдени одличните резултати на руската вакцина, која рангирана меѓу најбезбедните и најефикасните во светот.
Германија неколку пати повторуваше дека е подготвена да користи вакцини произведени надвор од ЕУ, но канцеларката Ангела Меркел и германскиот министер за здравство Јенс Шпан посочија дека предуслов е вакцината да биде одобрена од релевантното регулаторно тело на ЕУ.