Германскиот канцелар Фридрих Мерц смета дека САД немаат причина за можна интервенција во Куба, беше објавено по германско-бразилските консултации на владино ниво во понеделник во германскиот град Хановер.
– И покрај сите проблеми што оваа земја ги има со својот комунистички режим на внатрешно ниво, Куба не е закана за никого и не претставува никаква закана за другите земји, и затоа не гледам врз основа на што би била оправдана интервенцијата – рече Фридрих Мерц по консултациите во Хановер.
Германскиот канцелар рече дека „силно советува“ да се избегнува конфликт и да се применат дипломатски решенија за проблемот.
– За да не започнеме уште еден конфликт што не е потребен – рече Фридрих Мерц на заедничката прес-конференција со бразилскиот претседател Лула да Силва.
Фридрих Мерц рече дека го признава правото на секоја нација на „силна способност за самоодбрана“.
– Но, можноста да се одбраните не значи дека имате право воено да интервенирате во други земји ако тамошните политички системи не одговараат на вашите ставови – рече Мерц.
Бразилскиот претседател Лула да Силва, исто така, остро ја отфрли можноста за инвазија на Куба.
– Јас сум против непочитувањето на територијалниот интегритет на народите. Јас сум против која било земја во светот да се меша во внатрешните работи на друга земја и да ѝ наметнува како треба или не треба да функционира. А каде е правото на народите на самоопределување? Каде е почитувањето на човековите права? Каде е почитувањето на Повелбата на Обединетите нации – рече Лула да Силва.
Уште пред состанокот, на отворањето на саемот во Хановер, Лула да Силва остро ја критикуваше војната што САД и Израел ја водат против Иран, нарекувајќи ја „лудило“.
Оваа година, Хановер Мес го има Бразил како земја-партнер на најголемиот индустриски саем во светот.