Основачот на Мајкрософт, Бил Гејтс, ја поддржува демократската потпретседателка на САД, Камала Харис, во претседателската трка во 2024 година, пишува американски Њујорк Тајмс. Извори блиски до Гејтс потврдија дека милијардерот, познат по тоа што јавно останува надвор од политиката, донирал околу 50 милиони долари на непрофитна организација која ја поддржува Камала Харис.
Во изјава за Тајмс, Гејтс ниту ја потврди ниту ја демантираше донацијата, но рече: „Овие избори се поинакви“.
Според извештајот на Тајмс, Гејтс е загрижен за економските политики на поранешниот претседател Доналд Трамп и можните кратења на планирањето на семејството и глобалните здравствени програми, клучни прашања за Фондацијата Бил и Мелинда Гејтс.
Донацијата на Гејтс за поддршка на демократската кандидатка доаѓа откако во последните денови се промени мислењето за нејзините шанси да го победи Трамп на претседателските избори.
Платформата Polymarket која го предвидува движењето на криптовалутите објави 2,3 милијарди долари облози за исходот на изборите, па го предвидува Трамп со веројатност од 64 проценти.
Милијардерот инвеститор Стенли Дракенмилер минатата недела во интервју за Блумберг сугерираше дека инсајдерите на пазарот се залагаат за победа на Трамп.
Поранешната сопруга на Бил Гејтс, исто така милијардер филантроп, Мелинда Френч Гејтс, ја поддржа Харис во јули и направи голема донација за нејзината кампања.
– Бев среќна што ја поддржав Камала – изјави Гејтс во емисијата „The Late Show“ на Стивен Колбер во јули.
– И порано работев со неа, таа знае што ни треба во општеството – додаде таа.
Милијардерката Лорен Пауел Џобс исто така донираше за Харис и е нејзина долгогодишна блиска пријателка.
Пауел Џобс и нејзината филантропска и инвестициска куќа „Емерсон колектив“ силно ја финансираа демократската политика во последниве години.