Руската Федерална служба за безбедност (ФСБ) денеска соопшти дека уапсила осум лица осомничени за вмешаност во организирањето на нападот врз мостот што го поврзува анектираниот Крим со Русија.
Според ФСБ, приведени се петмина Руси, како и уште тројца државјани на Украина и на Ерменија.
Спроведената истрага покажала дека експлозивната направа со која бил извршен нападот била камуфлирана во ролни со градежна полиетиленска фолија, спакувана на 22 палети со вкупна тежина од 22.770 килограми. Експлозивот на почетокот на август бил испратен со брод од пристаништето Одеса во Украина до бугарското пристаниште Русе. Потоа пратката поминала преку пристаништето Поти во Грузија, а потоа била испратена во Ерменија од каде по копнен пат стигнала во Русија.
Руската разузнавачка служба соопшти дека експлозивната направа влегла во Русија на 4 октомври во камион со грузиски регистарски таблички, пред да стигне до руската област Краснодар што граничи со Крим, два дена пред експлозијата.
Според ФСБ, тој „терористички чин” го организирала украинската воена разузнавачка служба, наведувајќи дека агент од Киев го координирал транзитот на експлозивот, преку различни посредници.
Силна експлозија во саботата го оштети мостот на Крим што го поврзува полуостровот анектиран од Русија со остатокот од руската територија. Железничкиот и патниот сообраќај подоцна беше делумно воспоставен преку мостот што претставува важна линија за снабдување на руската армија.
Руските власти соопштија дека експлозијата ја предизвикал камион натоварен со експлозив. Како одговор за нападот руската армија изминатите два дена изврши серија ракетни напади врз цели низ цела Украина.
Извор: МИА