Источниот брег на САД следнта седмица ќе биде погоден од невообичаена мешавина на ураган и снежна бура која веќе ја нарекуваат „Франкенсторм“.
Се очекува дека најтешко ќе биде погодена областа околу Њујорк и Њу Џерси.
Прогнозерите ги зголемија шансите дека ќе се случи сериозна временска непогода, наведувајќи дека 90% е веројатноста истокот на САД да биде погоден од ветер со сила на ураган, обилни дождови, поплави, а можеби и снег, кој ќе започне од недела и ќе паѓа до првите денови од ноември.
По проценките на метеоролозите, невремето би можело да предизвика материјална штета од милијарда долари.
Бурата ќе биде комбинација од ураганот Сенди, кој засега е над Карибите, рана зимска бура која доаѓа од запад и продор на артички воздух. Се очекува трите временски неприлики да се судрат над источниот брег, а потоа да навлезат се до државата Охајо.