Напаѓач во станбен блок во јужниот дел на Флорида уби шест лица пред да биде застрелан од специјалните единици на полицијата, пренесува ДПА.
Нападот почнал синоќа во 18.30 часот по локално време во петкатна зграда во Хиалеа, северно од Мајами и траел неколку часа.
Полицијата откри тела на две лица, застрелани на приземјето, пред еден од апартманите и уште три лица убиени на друг кат од зградата. Уште едно лице е убиено на улица, откако напаѓачот пукал во него од зградата.
Двајцата заложници, што ги земал напаѓачот, се спасени од полицијата.
Според весникот „Мајами Хералд“ причина за нападот е спор за еден од апартманите во зградата. Брачната двојка, која управувала со зградата, била застрелана од напаѓачот додека му поднесувала жалба од друг станар.
Во зградата живеат 90 семејства.