Лидерот на француската партија „Патриот“, Флоријан Филипо, оцени дека одлуката на Московскиот арбитражен суд во спорот меѓу Централната банка на Русија и белгискиот депозитар „Еуроклеар“ може да има сериозни последици за Европската Унија и нејзините планови во врска со руските средства.
Коментирајќи ја одлуката на судот на својот YouTube канал, Филипо рече дека Москва со овој потег го зголемува притисокот врз европските земји.
„Ова е многу паметен потег од страна на Русија и ги зголемува тензиите меѓу европските земји“, рече францускиот политичар.
Според Филипо, Европската Унија сега би можела да се најде во ситуација каде што мора да побара дополнителни средства од даночните обврзници, што, според него, би можело да ја ослабне поддршката за Украина.
Московскиот арбитражен суд претходно го прифати тужбеното барање на Централната банка на Русија против „Еуроклеар“ во износ од околу 18,17 трилиони рубли, или приближно 200 милијарди евра. Според адвокатите на „Еуроклеар“, судот го прифатил барањето на Руската централна банка во целост, а постапката се одржала зад затворени врати.
Централната банка на Русија побара надомест на штета поради неможноста да располага со средствата и хартиите од вредност блокирани според западните санкции. По почетокот на конфликтот во Украина, Европската Унија замрзна голем дел од руските државни резерви, а значаен дел од овие средства се наоѓаат во системот на белгискиот депозитар на „Еуроклеар“.
„Еуроклеар“ најави жалба и изјави дека не ги признава правните барања поднесени против оваа институција во Русија според правото на Европската Унија.