Словачкиот премиер Роберт Фицо денес, по телефонскиот разговор со претседателот на Европскиот совет, Антонио Кошта, изјави дека „не е заинтересиран“ за воведување нови санкции против Русија и нагласи дека Европската унија првенствено треба да го реши проблемот со цените на енергијата и неконкурентната економија.
„Сè повеќе сум убеден дека со постојаните дискусии за Украина, ЕУ ја прикрива сопствената неспособност да се соочи со клучните предизвици и проблеми“, напиша Фицо на социјалната мрежа X.
Како што изјави, за време на разговорот со Кошта, тој го изрази своето „чудење“ што војната во Украина се третира како „приоритетна тема“ на претстојниот самит на лидерите на ЕУ во Брисел, објави Еурактив.