Постојат најмалку 30.000 лица вмешани во шверц на имигранти и бегалци во Европа, изјави за грчкиот весник „Катимерини” директорот на Европол Роб Вајнрајт.
Во интервју за весникот по неодамнешните посети на Атина и на островот Кос, Вајнрајт истакна дека има забележително зголемување на бројот на криумчарски мрежи, при што, само оваа година властите регистрирале 30.000 осомничени.
Според него, бандите обично се формирани од ситни криминалци од Сирија, Турција, Ирак и Грција. Шефот на Европол рече дека 15 Сиријци и Египќани, кои беа уапсени во Атина во март заработиле 7,5 милиони евра од трговија со луѓе.
Роб Вајнрајт посочи дека бандите често се занимаваат и со друг вид шверц, како шверц на оружје и дрога.
Според него, меѓу грчките власти и Европол има брза размена на информации, што ги прави истрагите поефикасни.