Европската унија денеска побара итно повлекување на тешкото оружје од првата борбена линија во источниот дел на Украина, изразувајќи загриженост поради ескалацијата на судирите во градот Дебаљцево.
– Уште еднаш укажуваме на потребата сите страни во судирите строго да се придржуваат до одредбите на минатонеделниот потпишан договор во Минск и веднаш да ги спроведат, изјави портпаролот на Европсјката комисија Кетрин Реј.
Според неа, украинските и проруските сили мораат да ги прекинат сите воени активности и уште денес да почнат со повлекување на тешкото оружје.
– Загрижени сме поради продолжувањето на судирите во и околу Дебаљцев, нагласи Реј, откако западни медиуми објавија дека во овој град во источниот дел на Украина денеска првпат избиле улични борби.
Официјален Брисел, исто така, изрази загриженост и поради тоа што на набљудувачите на ОБСЕ им е забрането да влезат во Дебаљцево, со што е загрозена нивната работа.