Европската унија соопшти дека е подготвена да го употреби своето најмоќно трговско оружје против САД, откако претседателот Доналд Трамп се закани со големи царини и рече дека ЕУ е создадена за да ја „измами“ Америка.
– Го имаме Инструментот против принуда (ACI) и ќе бидеме принудени да го користиме, изјави комесарот за земјоделство Кристоф Хансен во Париз по средбата со неговата француска колешка Ани Женевард на саемот „Салон де л’Агрикултура“.
Механизмот што тој го споменува, таканаречената трговска базука на ЕУ, беше дизајниран за време на првиот мандат на Трамп и првично беше наменет како средство за одвраќање од Кина.
Тоа ѝ дозволува на Европската комисија да ја ограничи трговијата со услуги ако процени дека некоја земја користи царини за стоки за да ја принуди ЕУ да ја промени политиката. Заканите на Трамп за царини спаѓаат во таа категорија, според европските претставници.
Кога ACI беше изгласан во 2023 година, некои европски претставници го нарекоа „базука“. Неговата примена овозможува широк спектар на одмазднички мерки, вклучувајќи го и прекинувањето на заштитата на интелектуалната сопственост и ограничувањето на комерцијалната експлоатација – што би можело да значи забрана за преземање софтвер и користење на услуги за стриминг.
ЕУ би можела да ги ограничи и странските инвестиции или да го блокира пристапот до европскиот пазар за американските банкарски, осигурителни и финансиски компании. Сепак, и покрај искуството со наметнување царини на стоки, ЕУ се двоуми да го прошири конфликтот во областа на услугите и интелектуалната сопственост.
Забелешките на Хансен дојдоа еден ден откако Трамп се закани дека ќе воведе сеопфатни царини од 50 проценти „на автомобили и сè друго“, предизвикувајќи бура од негодување во Европа. Политичарите јасно ставија до знаење дека е време за решителен одговор од Брисел.