Европскиот комесар за внатрешни работи и миграција Димитрис Аврамопулос денеска во Будимпешта изјави дека огради и насилство не се решение за миграциската криза и ги повика унгарските власти да се придружат на заедничките европски напори за нејзино решавање.
– Ѕидовите се привремено решение, изјави еврокомесарот по средба со членовите на унгарската влада, додавајќи дека тие само го пренасочиле бранот бегалци и предизвикале тензии.
Аврамопулос оцени дека и насилството не е решение, нагласувајќи дека поголем дел од бегалците се Сиријци, што никакви пречки нема да ги запрат во бегството од насилството и теророт во нивната држава.
Еврокомесарот им укажа на унгарските власти дека е нивна морална должност да ги заштитат овие луѓе, како и дека на тоа ги обврзуваат европските и меѓународни принципи и закони.
– Апелирам до вас да работите заедно со нас, ЕУ, да пронајдеме заедничко и трајно решение, истакна Аврамопулос.