Европската Комисија одлучи да ги одложи тарифите што ги најави како контрамерки на американското воведување царини за увоз на челик и алуминиум од ЕУ.
Комисијата кон средината на март објави дека ќе ги активира постоечките контрамерки против САД кои беа суспендирани во 2018 и 2020 година на 1 април и дека ќе усвои нов пакет контрамерки за американскиот извоз во средината на април.
„Сега размислуваме за тајмингот на овие два пакета контрамерки на ЕУ за да можеме да се консултираме со земјите за нив, а тоа исто така ќе ни даде дополнително време за преговори со нашите американски партнери“, рече комесарот за трговија Марос Шефчовиќ во Европскиот парламент.
Сега двата пакета контрамерки треба да стапат на сила во средината на април.
Првиот сет на контрамерки се однесува на низа американски производи како што се мотоцикли, бурбон и чамци и е одговор на економската штета вредна 4,5 милијарди евра од извозот на челик и алуминиум од ЕУ. Вториот пакет се однесува на американскиот извоз во вредност од 18 милијарди евра.