Европската Унија ја поддржува европската интеграција на Украина и нејзината намера да стане полноправна членка до 2028 година, но постигнувањето на оваа цел зависи од динамиката на реформските процеси, изјави портпаролот на Европската Комисија, Гијом Мерсие, за РБЦ-Украина.
Според Мерсие, и покрај воените околности и тековните предизвици што ги претставува конфликтот со Русија, Киев „останува решително посветен на својот пат кон пристапување во ЕУ, откако успешно го заврши скринингот и постигна напредок во клучните реформи“.
Мерсие потсети дека украинската влада официјално објави план за завршување на преговорите за пристапување до крајот на 2028 година, нагласувајќи дека Европската Комисија ќе продолжи да го поддржува процесот. Сепак, тој истакна дека „постигнувањето на оваа амбициозна цел бара забрзување на темпото на реформите, особено во областа на владеењето на правото и други фундаментални прашања“.
За потсетување, „Вашингтон пост“ неодамна објави, повикувајќи се на американски и украински претставници, дека Украина, според сегашната верзија на мировниот план на САД, би можела да стане членка на ЕУ веќе во 2027 година. Сепак, оваа можност предизвикува резерви кај некои земји-членки, првенствено кај Унгарија. Администрацијата на американскиот претседател Доналд Трамп, пишува весникот, верува дека и ова спротивставување може да се надмине.