Турскиот премиер Реџеп Таип Ердоган го обвини Израел дека изведува етничко чистење, прекршувајќи ги меѓународните закони и окупирајќи палестинска територија, пренесе агенцијата Анадолија.
Ердоган зборуваше на заседание на парламентарната група на неговата Партија на правдата и развојот (ППР).
-Без воопшто да ги почитува мирот во регионот и газејќи по меѓународното право, Израел изведува етничко чистење против еден народ. Чекор по чекор ја окупира палестинската територија, изјави турскиот премиер, цитиран од приватната телевизија Си Ен Ен-Турк.
Според Ердоган, Палестинците, „кои се лишени од најосновните човекови права, сосема основано го користат своето право на отпор и легитимна заштита заради окупацијата и обидот за етничко чистење“.
-Се обраќам од тука кон целиот западен свет: никој не може да каже Израел го употребува своето право на заштита. Во моментов Израел сее терор на Блискиот исток, додаде турскиот премиер.
Ердоган уште и истакна дека не верува во праведноста на ОН.