Една четвртина од возрасните Британци знаат математика колку десетгодишно дете, покажува истражување на Организацијата за економска соработка и развој (ОЕЦД).
Истражувањето со кое биле опфатени 166.000 луѓе покажало дека Велика Британија има мошне лоши показатели во образованието на децата, па се најде на последно место меѓу 24-те најразвиени земји во светот. Според истражувањето, денешните млади Британци немаат подобро основно знаење од она на нивните дедовци и баби.
Младите Британци се меѓу најлошите во читањето, пишувањето и според математичката наобразба, споредено со нивните врсници во земјите од развиениот свет.
Првото вакво истражување на ОЕЦД откри дека не само што возрасните знаат математика колку малите ученици, туку и младите на возраст меѓу 16 и 24 години во познавањето на јазикот се на 22 место, кај предметот литература се на 21, а кај аритметиката се на последното, 24 место.
Претставник на ОЕЦД изјави дека Велика Британија е целосно потисната од земји, како Јапонија на пример, каде има значителен напредок во основното образование кај младите.
Британските експерти за образование признаваат дека се „чувствуваат поразени“ од резултатите на обемното истражување. Тие сметаат дека образованието на младите кое се покажа дека е недоволно, може да биде уште полошо доколку не се преземат итни мерки за промена на ваквата состојба.
Експертите укажуваат дека податокот оти 8,5 милиони возрасни Британци не се подобри во математичкото знаење од едно десетгошно дете, ја доведува во прашање глобалната конкурентската способност на земјата, но ги прави овие луѓе да бидат лесно ранливи кога станува збор за нивното образование, при барањето и обезбедувањето на работно место.