Британскиот министер за надворешни работи Борис Џонсон, во пресрет на Самитот на лидерите од земјите од Западен Балкан, што денеска се оддржува во Трст и на кој и тој присуствува, порача дека ќе ги здружи силите со британските сојузници за да му се помогне на регионот да се реформира, стабилизира и просперира.
Џонсон најави ќе го повика регионот и пријателите да ги засилат напорите со цел Балканот да се развива како „светилник на демократијата и економскиот раст“.
Шефот на британската дипломатија, исто така, на собирот во Трст ќе потврди дека Велика Британија ќе биде домаќин на Самитот за Западен Балкан во 2018 година, а во пресрет на денешниот Самит во Трст тој рече дека е горд што неговата земја следната година ќе биде домаќин на таков собир.
– Тоа е силен доказ за нашата поддршка на неопходните реформи за да се подобри безбедноста на регионот, да се засили економијата и да се спречат предизвиците како што се илегалната трговија на дроги и луѓе, кои претставуваат закана за сите нас, било да сме на Западен Балкан или во Велика Британија, рече тој во пресрет на самитот.
Форин офисот соопшти дека денеска на Самитот во Трст ќе биде лансиран новиот Акциски план за регионална економска зона за да се поттикне отворањето нови работни места, нови инвестиции во областа на сообраќајната и енергетската инфрастртукура, како и дигиталните проекти заради подбро поврзување во регионот.