41-годишната Британка Ема Ловел, по потекло од областа Ипсвич, беше избодена до смрт на 26 декември за време на кражба во нејзиниот дом во Австралија. Полицијата потврди дека 41-годишната жена починала откако се соочила со натрапниците во нејзиниот дом во Норт Лејкс, пишува Sky News.
Нејзиниот 43-годишен сопруг, Ли Ловел, кој исто така бил избоден со нож, им рекол на новинарите дека неговото семејство е „уништено“. “Ема го држеше нашето семејство заедно. Беше толку убава личност. Сите сме уништени од нејзината загуба. Бесмислено е. Не знам зошто луѓето го прават ова”, рече Ли.
Насилниците и биле од претходно познати на полицијата
Две 17-годишни момчиња се обвинети за убиство. Во соопштението на полицијата се вели дека расправијата се случила на адреса во Витфилд Кресент, а потоа „се преселила во дворот“. Двајцата сторители побегнале пеш пред да дојде полицијата. „Истражителите употребија тим од кучиња за да лоцираат четворица тинејџери на блиската локација нешто пред 4 часот наутро“, соопшти полицијата.
Двајца 17-годишници се обвинети за убиство, обид за убиство и неовластено влегување во туѓ имот. Во меѓувреме, уште еден 17-годишен и еден 16-годишник продолжуваат да и помагаат на полицијата во истрагата. Од полицијата наводно потврдиле дека сите четворица малолетници и биле и претходно познати на полицијата.