Прогнозите на Шведските пошти покажуваат дека граѓаните годинава ќе испратат преку пошта околу 28 милиони божиќни и новогодишни честитки.
Приближно 70 отсто од домаќинствата во Шведска и понатаму испраќаат божиќни честитки до најблиските роднини и пријатели, јави дописникот на МИА од Гетеборг.
Во 90-тите години количеството на божиќната пошта беше повеќе од двојно поголемо, но и покрај надолниот тренд во последните години Шведските пошти се задоволни со годинашниот резултат.
– Со 28 милиони божиќни честитки во Шведска уште еднаш добивме потврда дека своерачно напишаниот поздрав е многу повеќе личен отколку СМС-порака или порака на Фејсбук, вели генералниот директор Андерс Факенмарк во соопштението на Шведските пошти.