Полскиот претседател Анджеј Дуда денеска изјави дека Украина ќе мора да направи компромис за да ја прекине војната и дека двете страни, Москва и Киев, ќе мора да направат отстапки.
Во интервју за Еуроњуз, Дуда нагласи дека никој освен САД не е во состојба да ја запре Русија.
„Денес мојот заклучок е целосно јасен – нема никој, освен САД, кој би можел да го запре (рускиот претседател) Владимир Путин. Затоа верувам дека претседателот Доналд Трамп, со својата решителност, може да стави крај на оваа војна. Само овој американски притисок може да стави крај на оваа војна и да помогне да се постигне мир кој нема да биде поволен за ниту една страна“, рече Дуда.
Тој додаде дека Украина ќе мора да направи отстапки за некои прашања за да се постигне траен мир.
„Тоа мора да биде компромис. Според мое лично мислење, овој де факто мир треба да се сведе на фактот дека ниту една страна нема да може да каже дека победила во оваа војна, бидејќи секоја страна ќе мора да попушти до одреден степен. Па, Украина исто така ќе мора да попушти до одреден степен, бидејќи тоа веројатно ќе се случи. До кој степен? Тешко ми е да одговорам во оваа фаза“, рече полскиот претседател.