Американскиот претседател Доналд Трамп ја обвини Русија за кражба на американските планови за хиперсонична ракета за време на администрацијата на претседателот Барак Обама.
Во своето неодамнешно обраќање, Доналд Трамп го коментираше балансот на силите меѓу САД и Русија, нагласувајќи дека Русија го „украла од САД“ нејзиното знаење за развој на хиперсонични ракети.
„Русија ни го украде дизајнот, тие го добија од нас“, рече Трамп, посочувајќи дека Русија ги украла американските податоци за хиперсоничното оружје за време на администрацијата на Барак Обама.
Американскиот претседател не даде повеќе детали за своето тврдење, но додаде дека „некоја лоша личност им помогнала на Русите“. На прашањето за американското хиперсонично оружје, Трамп уверува дека САД сè уште развиваат „супер-хиперсонични ракети“.
Ова не е прв пат Доналд Трамп да ја обвини Русија за кражба на технологија и технолошки решенија, а Русија претходно негираше дека дошла до нови технологии и оружје преку кражба.