Две петгодишни девојчиња незабележано избегале од градинка во Сибир на температура од минус 45 степени Целзиусови затоа што сакале да одат дома и да ги изненадат родителите.
Девојчињата биле пронајдени, но се здобиле со смрзнатини и паднале во состојба на хипотермија.
Како што јави Би-Би-Си, тоа бил еден од најстудените денови во регионот.
Безбедносните камери го снимиле моментот кога девојчињата излегуваат од градинката и на снимката се гледа дека едното од нив носи играчка, а другата немала ракавици.
Едно од девојчињата, Лена, моментално е во болница во Јакутск и има смрзнатини на три прсти, јавија локалните медиуми. Нејзината мајка Евдокија Кутукова забележала дека ќерка и исчезнала во селото Нанци кога дошла по неа во градинка и видела дека и ја нема јакната. Таа веднаш пријавила и набргу било утврдено дека во градинката не е ниту најдобрата другарка на Лена чие име не е објавено. Кутукова информира дека потоа и се јавил дедото и рекол дека Лена само што стигнала дома, сама, расплакана и смрзната. Нејзиниот сопруг навел дека некој непознат човек на Лена и дал шал кој многу и помогнал.
Другото девојче се загубило на патот до дома и било пронајдено еден час подоцна. Таа била во состојба на хипотермија, но откако ја прегледале лекарите ја пуштиле дома.
Покрената е истрага во врска со случајот.