Девет лица се повредени денеска на забава по матурската вечер во градот Џаспер, во американската држава Тексас, соопшти полицијата на округот.
Полицијата на местото на настанот пронајде девет жртви со прострелни рани, но ниту една не била опасна по живот, објави Си-Би-Ес Њуз.
По престрелката се сослушани неколку осомничени.
– Немаше инциденти на матурската вечер, изјави за Си-Би-Ес началникот на независниот училишен округ Џаспер, Остин Џон Сиболд.
„Прво, сакаме да кажеме дека нашите молитви се со оние кои беа повредени денеска во престрелката што се случи во северниот дел на градот. Сакаме да ги изведе сторителите пред лицето на правдата. Во училиштето оваа недела ќе има поголемо полициско присуство за да се обезбеди безбедноста на учениците, а ќе има и советници-психолози кои ќе му помогнат на секој на кој ќе му треба помош“, рече Сиболд.
Џаспер се наоѓа во источен Тексас, на околу 60 километри од границата со Луизијана.