Израелците синоќа протестираа низ целата земја против политиката на десничарската верска влада на премиерот Бенјамин Нетанјаху. Десетици илјади луѓе протестираа во неколку градови носејќи сино-бели национални знамиња и транспаренти.
Во центарот на овонеделните протести беа зголемувањето на насилството во арапскиот сектор и клучното парламентарно гласање следната недела. Според извештаите на медиумите, од почетокот на годината во Израел се убиени стотина арапски жители – речиси три пати повеќе отколку во истиот период во 2022 година.
Полицијата под раководство на министерот за национална безбедност Итамар Бен-Гвир е обвинета дека не преземала доволно мерки против бранот насилство. На некои од транспарентите на демонстрантите пишуваше: „Бен-Гвир, не си дораснат за ова. Поднеси оставка!“.
Антивладините протести се редовна појава во Израел од почетокот на годинава. Една од целите на коалицијата на Нетанјаху е да го ослаби Врховниот суд со судски реформи. Нетанјаху ги суспендираше плановите во март по силен притисок, а разговорите меѓу владата и опозицијата досега не постигнаа договор.
Се очекуваат нови протести
Централниот дел на сеопфатниот предлог-закон е промената на комисијата за избор на судии. Во среда парламентот ќе гласа за двајца претставници на тоа деветчлено тело.
Традиционално, еден од двајцата доаѓа од опозицијата. Сепак, неколку пратеници побараа двете места да и се дадат на водечката коалиција. Ваквиот потег може да предизвика нови протести во земјата.