Уште еден земјотрес со јачина од 3,7 степени според Рихтеровата скала го погоди денес Истанбул, соопшти Турската агенција за управување со вонредни состојби и катастрофи (AFAD). Земјотресот е регистриран во 11:36 часот по локално време, а епицентарот е во Мраморното Море во близина на Текирдаг, на длабочина од 18 километри.
„Тоа е афтершок од главниот земјотрес со јачина од 6,2 степени што го погоди Истанбул на 23 април. Сега земјата се смирува. Сè е нормално, нема потреба да се бега“, рече експертот за земјотреси Ахмет Ерџан.
Опсерваторијата Кандили објави дека земјотресот што се случил денес во 11.36 часот имал интензитет од 4 степени. Како што објави Хаберлер, потресот бил почувствуван и во околните провинции, вклучувајќи го и Истанбул.
Силен земјотрес со интензитет од 6,2 степени според Рихтеровата скала го погоди Истанбул на 23 април, со епицентар на длабочина од десет километри во земјината кора.
По тој земјотрес, Турската агенција за природни катастрофи регистрираше серија од неколку стотици последователни потреси по должината на брегот на Мраморното Море.