Податоците од летот и гласовните снимачи од пилотската кабина на авионот на Јеју Ер кој се урна на 29 декември престанале да се снимаат околу четири минути пред авионот да удри во бетонска конструкција на јужнокорејскиот аеродром Муан, соопшти Министерството за транспорт.
Властите кои ја истражуваат катастрофата во која загинаа 179 лица, најлошата на јужнокорејско тло, планираат да анализираат што ги натерало снимачите на црната кутија да престанат да снимаат, се вели во соопштението на Министерството. Снимачот на глас првично беше анализиран во Јужна Кореја, а кога беше откриено дека недостасуваат податоци, тој беше испратен во лабораторија на Националниот одбор за безбедност на транспортот на САД.
Оштетениот рекордер за податоци за летот е однесен во САД на анализа во соработка со американскиот безбедносен регулатор. Јеју Ер 7C2216, кој полета од главниот град на Тајланд, Бангкок за Муан во југозападна Јужна Кореја, силно удри на пистата на регионалниот аеродром, експлодирајќи во пламен откако удри во ѕид.
Пилотите ѝ кажале на контролата на летање дека леталото претрпело удар од птици и прогласиле тревога четири минути пред да се урне. Двајца повредени членови на екипажот, кои седеа во делот од опашката, се спасени.