Човекот кој загина во „Tesla Cybertruck“ кој се запали пред хотелот на новоизбраниот американски претседател Доналд Трамп во Лас Вегас, бил високо одликуван припадник на Зелените беретки на американската армија, кој двапати бил распореден во Авганистан, соопштија денеска официјални лица.
Човекот кој загина во автомобил со футуристички изглед пред хотелот на Трамп е идентификуван како Метју Ливелсбергер, кој служел во Зелените беретки, високо обучени специјални сили кои се користат за борба против тероризмот во странство и за обука на партнери, соопшти денеска американската војска.
Тој служеше во армијата од 2006 година, двапати беше распореден во Авганистан, како и во Украина, Таџикистан, Грузија и Конго.
Тој беше награден со две бронзени ѕвезди, вклучително и една со Медал за храброст, борбена значка за пешадија и армиски медал за пофалба за храброст.