Чешкиот премиер Петр Фијала изјави денеска дека рускиот претседател Владимир Путин бара само изговори за да го избегне примирјето предложено од Украина и затоа Чешка продолжува со иницијативата за муниција, во која посредува во снабдувањето на Украина со артилериска муниција од трети земји.
„Додека Украина е подготвена за целосно примирје поддржано и од Европа и од САД, Владимир Путин го одбива и повторно бара начини да го избегне. Повторно покажува кој сака војна, а кој сака мир. Притисокот врз Москва мора да продолжи, тоа е единствениот начин да се стави крај на страдањата на милиони луѓе“, изјави денеска Фијала.
Премиерот Фијала додаде дека заедничката цел на „коалицијата на волните“, дел од земјите на ЕУ, а со нив и Велика Британија, е да изврши што поголем притисок за Русија да се согласи на праведен и траен мир.
„Патот до тоа е да и помогнеме на украинската армија. Затоа ја продолжуваме Иницијативата за муниција, зголемувајќи ги капацитетите за обука на украинските пилоти, доставувајќи тешка воена опрема на бојното поле“, рече Фијала.